3 Nëntor, 2016 Programi Kërko Drejtësi nënshkroi një marrëveshje për grant me Lëvizjen FOL – e cila është një ndër OJQ-të kryesore monitoruese që i adreson çështjet e zbrazëtirave të transparencës përbrenda sistemit gjyqësor në mënyrë që të inkurajoje llogaridhënien e akterëve gjyqësorë.

Në periudhën fillestare të zbatimit te grantit, Lëvizja FOL do të zhvillojë një platformë të e-drejtësisë për sektorin e drejtësisë e cila do t’i japë mundësinë FOL-it dhe publikut të monitorojë dhe të mbështesë gjyqtarët apo prokurorët të cilët do te rrisin transparencën dhe llogaridhënien në sistemin gjyqësor ne proporcion me detyrimet e tyre kushtetuese dhe obligimet tjera relevante ligjore. Procesi i FOL-it për plotësimin e platformës së e-drejtësisë me informacione publike si: Orari i mbajtjes së seancave gjyqësore, arsyet e anulimit te mbajtjes së seancave gjyqësore, aktgjykimet apo vendimet e gjykatës, niveli i performancës së gjykatësve apo prokurorëve dhe deklarimet financiare do te informohet përmes intervistave me palët e interesit, hulumtimit ligjor dhe diskutimeve nacionale apo debateve.

Kërko Drejtësi është një program i financuar nga Departamenti i shtetit te Amerikës/INL i cili filloi ne gusht 2016 dhe i cili mbështet zhvillimin e një kërkese të fuqishme për drejtësi në Kosovë të bazuar në fakte. Po ashtu, ky program synon edhe rritjen e mendimit kritik dhe ndërtimin e aftësive praktike mes komunitetit ligjor.